مشايخ دوّارنا ما عندهمش إحساس*** كبسوا علينا الكبسة رمونا في الأحباس

مشايخ دوّارنا فيهم الفكر يحير ** دزّونا في بير** لا ربحنا في عقابهم لا فيهم خير

…
ربح ما ثمّاش كان خسارة *** في الظلام مشينا رانا طبنا

واحد لمْنا وحطْنا في شكارة *** والآخر عصر الحنظل و مَيَّتاه شرّبنا
هوما خذونا حق موش بصارة *** ذقنا العطب وزاد تعبنا

لا جار فارح باللِي انزاد لجاره *** الحلو عدِّيناه رانا شِبنا

….

مشايخ دوّارنا ما عندهمش إحساس*** كبسوا علينا الكبسة رمونا في الأحباس
عملوا معانا المُنكر عملوا شيء كبير *** عملوا معانا المنكر عملو شيء كبير

…

الخو يحفر لخوه يرميه في زرداب *** يرقى على أكتافه يَمعسهْ معسان

الولد ينكر بوه يقفل في وجهْه الباب *** صاروا جميع الناس يعيشوا في بهتان

نحكيو على دوّارنا والزمان معكوس *** صار فيه الفار ينقّز على القطوس
شُفت النعجة النايفة تعقّر في الذيب *** بعيني شُفت الصيد هارب من التبيب

…

مشايخ دوارنا الناس الظُلاّم *** ياكلوا في خيرنا عام وراء عام

فيناه قمح السرس فينا قمح الدير*** فيناه قمح السرس فينا قمح الدير

رحل قمح الدير ** فرغت المطامير ** شاح العرق في جبيننا ** قعدنا للشر

…

يا عبد اتّقِ مولاك لا تتجبّر*** راهو الكِبر في طبع الإنسان مرض
لا فرق بين المأمور واللِي يأمر *** الدنيا وحياتها لعبة حظ
ويناه فرعون اللِي طغا و تجبّر *** قال أنا رب السماء و الأرض
ويناه الفاطمي وقائده جوهر *** اللِي قهروا الناس باسم الفرض
حكم القيروان وبنى القاهرة متسيطر *** الملوك ركعت بين يديه قبلت الأرض

وينهم البايات و محلاّت العسكر *** مشات عظامهم سوست تحت تراب الأرض

أصحاب الكلمة