حَلّ حرب عَ الڤصرين

حل حرب ع الڤصرين شين افعالة    و المذبحة ما ڤصّرت في تالة

نفّذت حزمك فيهم ,هجّلت نسوة  تيتّمت ذريهم,عشرين حالة وحالة

علي بن غذاهم في المنام إيجيهم     يڤول بيّكم  يا ناس زاد اهباله

فرا شيش و اولاد العرب يحميهم     أهـل الشهامة و كلّهم رجّالة

ماجري وهمّامي معاهم أولاد هلال شدّوا حزامي الله يصونهم الدّلة

والشيخ  بو تسعين  يتبع  فيـهم    طلـڤوا عليه الغاز مات ڤبالة

عشرين يا لخوان نحصي فيـهم     ڤلبي وجعني  و دمعتي همّالة

يا جيش يا  أمن  علاش عليكم      تعادوا  أهلكم  تُڤتلوا ع الواله

شعب تونس وينه , ترى خاف م التهديد رفّت عينه, ورهّبه بوباله

الرقاب و القصرين, بوزيد والسّبالة   بلا شكّ  ما زالوا مع الايالة

حرام تتركوهم وحدهم يا اخواني    والشين طاغي بطغمته وعياله

ڤبضة حديد و سطوته شيطاني    و بارهاب ضيّع شعبنا و امواله

حتى الهروب ما فاد للّي يعاني   من الفقـر سـدّوا كـتبته ڤدّالة

والناس كرهاته وكرهت حزبه  ها الشين حُكمه و جريته و افعاله

 

أبوجعفرالعويني/10/01/11

(ڤ)( ga)